7 лістапада - Дзень Кастрычніцкай рэвалюцыі

Гэта дзяржаўнае свята заснавана Указам Прэзідэнта Рэспублікі Беларусь ад 26 сакавіка 1998 года № 157 і з'яўляецца сімвалам павагі да традыцый і здзяйсненняў папярэдніх пакаленняў.
Вялікая Кастрычніцкая сацыялістычная рэвалюцыя адбылася 25 кастрычніка (7 лістапада па новым стылі) 1917 года. У ноч з 7 на 8 лістапада 1917 года ў Петраградзе адбылося паўстанне. Па сігнале, якім стаў стрэл крэйсера «Аўрора», узброеныя працоўныя, салдаты і матросы захапілі Зімовы палац, зрынулі Часовы ўрад і абвясцілі Ўладу Рад.
Да 1991 года 7 лістапада быў галоўным святам СССР і насіў больш урачыстую, чым цяпер назву - Дзень Вялікай Кастрычніцкай сацыялістычнай рэвалюцыі. На працягу ўсёй савецкай эпохі 7 лістапада быў "чырвоным днём календара", гэта значыць дзяржаўным святам, якое адзначалі не толькі асаблівым колерам у штодзённіку, але і абавязковымі дэманстрацыямі працоўных, якія праходзілі ў кожным горадзе краіны.
Гісторыя гэтага свята скончылася з распадам Савецкага Саюза. У Расіі свята было перайменавана спачатку ў Дзень згоды і прымірэння, а затым і скасавана зусім. У Беларусі ж гэтае свята па-ранейшаму адзначаецца, але атрымала новую назву - Дзень Кастрычніцкай рэвалюцыі.
Захоўваючы гэты дзень сярод іншых памятных дат, мы тым самым аддаём даніну павагі мільёнам людзей, для якіх многія гады гэта было галоўнае свята дзяржавы.
Вялікая Кастрычніцкая сацыялістычная рэвалюцыя 1917 года стала адной з самых значных падзей XX стагоддзя, карэнным чынам паўплывала на ход далейшай сусветнай гісторыі і аказала вялікі ўплыў на гісторыю беларускай зямлі.
Пасля Кастрычніцкай рэвалюцыі адбылося самавызначэнне Беларусі, стварэнне нацыянальнай дзяржавы на савецкай аснове. На карысць менавіта гэтай формы дзяржаўнасці гаварылі настроі беларускага грамадства, прывабнасць палітычнай праграмы бальшавікоў, узрослая ваенная моц Савецкай Расіі на Заходнім фронце. БССР першапачаткова заняла тэрыторыю шасці паветаў былой Мінскай губерні - толькі частка Цэнтральнай Беларусі. Але маленькая рэспубліка з плошчай усяго 50 тыс. кв.км і насельніцтвам у 1,5 млн чалавек стала адным з сузаснавальнікаў Савецкага Саюза і сабрала вакол сябе спачатку ўсходнебеларускія, а потым і заходнебеларускія землі. Сучасная Беларусь - прамы спадчыннік і правапераемнік БССР, а БССР стала магчымай толькі пасля Кастрычніцкай рэвалюцыі.
Дзякуючы Кастрычніцкай рэвалюцыі беларускі народ набыў дзяржаўнасць, стварыў эканамічны і інтэлектуальны патэнцыял, збераг і ўзбагаціў нацыянальную культуру.
Сёння Рэспубліка Беларусь упэўнена ідзе ўласным шляхам развіцця. Стваральная праца, імкненне да сацыяльнай справядлівасці, павага да гісторыі і традыцый - галоўныя фактары кансалідацыі беларускага грамадства. Мы памятаем і шануем сваю гісторыю, таму з аптымізмам глядзім у будучыню.
У гэты святочны дзень жадаем вам і вашым родным моцнага здароўя, шчасця, спакою і міру, новых працоўных дасягненняў на карысць Рэспублікі Беларусь!