Канстытуцыі Рэспублікі Беларусь і інстытуту прэзідэнцтва спаўняецца 30 гадоў

У 2024 годзе Беларусь адзначыць знамянальную дату - 30-годдзе з дня прыняцця Канстытуцыі Рэспублікі Беларусь і 30-годдзе інстытута прэзідэнцтва ў нашай краіне.

Канстытуцыя Беларусі была прынята 15 сакавіка 1994 года. Яна ўпершыню ў гісторыі беларускай дзяржаўнасці замацавала статус рэспублікі як унітарнай дэмакратычнай сацыяльнай прававой дзяржавы, устанавіла прынцыпы дэмакратычнага ладу, прыярытэт правоў і свабод чалавека, вяршэнства міжнароднага права. Акрамя таго, Канстытуцыяй упершыню ў гісторыі краіны ў сістэме вышэйшых органаў дзяржаўнай улады прадугледжана пасада Прэзідэнта Рэспублікі Беларусь. Гэты дакумент заклаў трывалы прававы фундамент незалежнасці, рэалізаваў імкненне беларускага народа быць паўнапраўным гаспадаром на роднай зямлі. 15 сакавіка штогод адзначаецца дзяржаўнае свята - Дзень Канстытуцыі Рэспублікі Беларусь.

Канстытуцыя 1994 года дзейнічае са змяненнямі і дапаўненнямі, прынятымі на рэспубліканскіх рэферэндумах 24 лістапада 1996 года, 17 кастрычніка 2004 года і 27 лютага 2022 года.

Канстытуцыя Рэспублікі Беларусь увасабляе ў сабе пераемнасць і досвед шматвяковага гістарычнага шляху Беларусі. Яна грунтуецца на неад'емным суверэнным праве беларускага народа мець сваю дзяржаўнасць і быць паўнапраўным суб'ектам сусветнай супольнасці. Беларуская Канстытуцыя гарантуе кожнаму грамадзяніну свабоды і правы, неабходныя для стваральнай працы, дастойнага жыцця і гарманічнага ўсебаковага развіцця асобы.

Сёння ўсім грамадзянам Рэспублікі Беларусь важна берагчы каштоўнасці, абвешчаныя Канстытуцыяй, бо дзякуючы ім фарміруецца стабільная, прававая, дэмакратычная дзяржава.